Anila Peci - Shekulli
22-11-2006


Vranë pas një grindjeje banale Klodian Dalipin nga Vlora, dënohen me 54-vjet burg. Paraditen e djeshme, Gjykata e Vlorës ka përfunduar procesin gjyqësor kundër Arben Liçaj, Elidon Liçaj dhe Sokol Hoxha. Tre të pandehurit u shpallën fajtorë për vrasjen në bashkëpunim të Klodian Dalipit, në vendin e quajtur “7 pallatet”, ngjarje kjo e ndodhur më 6 gusht 2004.
Sipas akuzës, Klodian Dalipi dhe Lik Bitaj kanë bërë debate për motive të dobëta me Sokol Hoxhën, tre ditë para vrasjes, në një lokal pranë detit. Tre ditë pas këtij incidenti, Lik Bitaj dhe viktima Dalipi kanë shkuar në njërin prej lokaleve pranë së cilës banonte Arben Liçaj dhe e kanë qëlluar atë me pistoletë. Pasi ka plagosur Arbenin, Klodian Dalipi është larguar me shpejtësi. Sipas trupit gjykues, në këtë kohë, Arbeni ka qëlluar në drejtim të Dalipit me pistoletën që kishte pasur me vete.
Pas një shkëmbimi zjarri, Klodian Dalipi ka gjetur vdekjen rreth 100 metra larg lokali. Trupi gjykues deklaroi se nga dëshmitë e dhëna gjatë seancave gjyqësore, dëshmitarët kanë deklaruar situata kontradiktore, ndaj edhe një pjesë e mirë e tyre nuk janë marrë parasysh. Por në dëshminë e tij, i akuzuari i vetëm që ndodhet në seancat gjyqësore, Arben Liçaj, ka deklaruar se në kohën që ishte futur në lokal, nuk ka pasur pistoletë me vete. “Ai më qëlloi me pistoletë dhe unë me zor kam dalë nga lokali. Me mua ishte edhe Sokol Hoxha”,-ka thënë i pandehuri, i cili nuk ka pranuar të ketë plagosur njeri. Arben Liçaj është dënuar me 16 vjet heqje lirie për vrasje në bashkëpunim, Elidon Liçaj u dënua për vrasje në bashkëpunim me 18 vjet heqje lirie ndërsa Sokol Hoxha u dënua me 20 vjet burg.