Shekulli
02-12-2006


VLORË- Viktima e atentatit të djeshëm, Shpëtim Muka, ishte ndër të paktët të fortë të Vlorës, që i mbijetoi trazirave të vitit 1997, por edhe nëntë viteve që pasuan, megjithë implikimet e tij në shumë ngjarje. Armiqtë e shumtë të 41-vjeçarit, deri dy ditë më parë i paprekshëm, duket se kanë rreshtuar një sërë pistash hetimore për zbardhjen e atentatit të djeshëm, ku përveç Mukës humbi jetën edhe fqinji i tij 22-vjeçar, Ervin Shehu.

Nga masakra e Levanit në Fier e deri tek ekzekutimi i Eleonora Ramës në qendër të Vlorës, ngjarje këto që dyshohet se mbajnë “vulën” e Mukës kanë qenë fillimisht pista të mundshme për zbulimin e ngjarjes së djeshme, që u përcoll gojë më gojë dje tek të gjithë banorët e Vlorës. “Pistat hetimore janë të shumta, për vetë implikimet në ngjarje të ndryshme të Mukës ndër vite”,-pohon për “Shekullin” një zyrtar i policisë lokale, që po merret me hetimin e çështjes. Ngjarja që e bëri Shpëtim Mukën të njohur në Vlorë ka ndodhur në vitin 1997, kohë kur vëllezërit e tij u vranë në një pritë në Levan. Asokohe, Muka ishte truprojë në firmën “Silva” dhe në qytetin bregdetar qarkulluan zëra se ai rrëmbeu një top dhe me të goditi lagjen e romëve në këtë fshat. Një tjetër ngjarje që mendohet se ka lidhje me ekzekutimin e Mukës është ajo e vrasjes së Leonora Ramës në qendër të Vlorës.

Gjatë ditës së djeshme, policia njoftoi se Sokol Rama dyshohet se është autor i vrasjes së nipit të Shpëtim Mukës, Slejdi Zanajt në Barcelonë të Spanjës, por edhe i Mukës. Fillimisht, hakmarrja e krijuar jashtë vendit i mori jetën oficeres së Marinës, ndërsa dy ditë më parë nuk kurseu as të fortin Shpëtim Muka. Kjo ngjarje zë një vend të rendësishëm në pistat e radhitura nga policia e Vlorës për ngjarjen e djeshme, pasi në shenjestër të autorëve kanë qenë dajë e nip të 16-vjeçarit të akuzuar për vrasjen e Ramës.