Aleancistët kanë kritikuar heshtjen e presidentit Topi për çështjen e referendumit në Vlorë

Reagimi: Investimi i Petroliferës dhe TEC-eve, lidhet me projektin naftësjellës Burgas-Vlorë, që ne nuk do ta lejojmë

Vlorë-Aleanca për mbrojtjen e gjirit të Vlorës ka lajmëruar dje rikthimin e protestave.

Reagimi ka ardhur përmes një deklaratë për shtyp, referuar heshtjes së presidentit Topi, pas takimit të tij të fundit me aleancistët, por edhe kundër mospërfilljes së institucioneve të tjera me të cilat është kontaktuar, të cilat kanë lënë në heshtje kërkesën e drejtë për Referendum.

***

Aleancistët kanë kritikuar ashpër mospërfilljen e kërkesës së qytetarëve vlonjatë dhe gjithë atyre që janë për mbrojtjen e qytetit të turizmit nga ndërtimet me bazë naftë. "Në këtë fushatë të pamoralshme, si nga pikëpamja politike ashtu edhe nga këndvështrimi i parimeve të demokracisë janë përfshirë dhe përfaqësues të huaj si ambasadori italian D'Elia dhe përfaqësuesja e BB-së në Shqipëri znj Margaret",- theksohet në deklaratën e bërë dje. Si për t'i vënë kapak mospërfilljes së tyre, qytetarët vlonjatë, kanë theksuar aleancistët, nëpërmjet medias u njohën me një hap tjetër të qeverisë Berisha, në drejtim të konkretizimit të projektit naftësjellës Burgas-Vlorë. Ndërkohë projekte të tjera për shfrytëzimin e territorit të gjirit të Vlorës për të prodhuar energji elektrike nga burime alternative janë duke e biseduar me përfaqësues të pushtetit lokal. "Në këtë mënyrë siç kemi pohuar vazhdimisht ne si aleancë, por vlen ta theksojmë përsëri, tashmë pas asnjë dyshim, vërtetohet se investimi i Petroliferës dhe TEC-eve, lidhet me projektin naftësjellës Burgas Vlorëedhe më tej, planet që i gjithë gjiri i Vlorës të shndërrohet në një park të madh elektro-energjetik. Ata kanë theksuar se është fjala për të ndërtuar një lloj zone industriale si ajo e Margeras/Venezia në Itali, që aktualisht është një ndër pikat më të ndotura të globit.

***

Në deklaratën e djeshme aleanca qytetarë për mbrojtjen e gjirit të Vlorës u ka kujtuar vendimmarrësve se qytetarët e Vlorës, Nartës, Zvërnecit, Orikumit dhe më gjerë, si dhe fëmijët e tyre do të jenë në mbrojtje të zonës që popullojnë. Për këtë, vetëm përmes referendumit ata do të vendosin për drejtimin që do të marrë jeta e fëmijëve, e bizneseve dhe pasurive që u ka falur natyra dhe kanë krijuar me punë dhe djersë. Gjithashtu me anë të kësaj komunikate për shtyp aleancistët kanë ftuar sërish qytetarët, përfaqësues të çdo kategorie, vlonjatë dhe emigrantë, që ka ardhur koha që vetëm me protesta të fuqishme demokratike të fitojnë të drejtën për Referendum. "Duke parë se plotësimi i plot 12 mijë anketimeve, është ende i pamjaftueshëm për ta drejtuar klasën e sotme politike që t'i binden vullnetit të popullit, protestat do të vijojnë",- thanë aleancistët. Kërkesa mbetet e pandryshuar. Të ndërpriten punimet e Petroliferës dhe TEC-it dhe t'i hapet rruga vendimmarrjes popullore me referendum.
 

Shekulli Online