Policia e Tiranës ka shpallur në kërkim vlonjatin Agim Leka, i cili kishte marrë me qera dyqanin e luleve përballë burgut

Tuneli, plan për arratinë e Gaxhait

Plani për arratisjen është thurur rreth 5 muaj më parë. I kërkuari pagoi 6 muaj paradhënie qeranë
Një plan i studiuar prej muajsh dhe shumë para të shpenzuara, në llogari të një arratisjeje për të mbetur në histori. Banori i përjetshëm i burgut 302, Gazmend Brraka dyshohet të ketë planifikuar gjithçka për t’u shpëtuar hekurave të qelisë së tij të ngushtë. Bashkëpunëtori i tij i jashtëm, sipas hetuesve të kësaj çështjeje është Agim Leka, një vlonjat i ardhur në Tiranë vetëm për të shpëtuar mikun e tij të dënuar me burgim të përjetshëm, emri i të cilit është pohuar me rezerva nga organet hetimore. Një gjë ishte e sigurtë, që prej mëngjesit të djeshëm për hetuesit: i burgosuri i përket asaj “kaste” të 302-shit që mban mbi supe një dënim të gjatë dhe njihet për lidhjet e tij me grupe të caktuara e me shumë para. Sipas hetimeve të deritanishme, arrestimi i Agim Lekës, qeraxhiut të dyqanit të luleve përballë burgut 302 pritet të zbardhë gjithë skemën e përgatitur për arratisjen e një ose më shumë të burgosurve nga qelitë e repartit 302. “Deri tani, ne kemi shpallur në kërkim Agim Lekën, pronarin e dyqanit prej nga ka filluar gërmimi i kanalit që ishte planifikuar të shkonte deri në burg”,-thotë një zyrtar i policisë së Tiranës për “Shekullin”.
Qeraxhiu
Agim Leka ka ardhur në Tiranë 5 muaj të shkuara. Sipas burimeve të policisë së kryeqytetit, ai ka lënë në Vlorë familjen e tij, ka mbushur “xhepin” me para dhe ka bujtur në Tiranë. I ka vënë syrin dyqanit përballë burgut 302, në rrugën “Mine Peza” të Tiranës dhe ka këmbëngulur ta marrë me qera. I është dukur perfekt, për të realizuar planin e arratisë së mikut të tij. Sipas burimeve nga vendi i ngjarjes, Agim Leka i ka shkuar në shtëpi pronarit të dyqanit, Njazi Njuma. I ka numëruar në dorë paratë për gjashtë muaj dhe ka filluar nga puna, për të maskuar qëllimin e tij të vërtetë me aktivitet tregtar. Dyqanin e ka mbushur me lule natyrale, por tregtarët fqinjë me të thonë se Lekës, rrallëherë i ndodhte të shiste ndonjë buqetë. Ndërkaq, burimet nga grupi hetimor pohojnë se puna për hapjen e kanalit mendohet të ketë filluar rreth tre muaj më parë.
Bashkëpunëtorët
Hetuesit e kësaj çështjeje pohojnë për “Shekullin” se prapa planit të arratisjes mendohet të fshihen një grup i madh njerëzish. Ky dyshim është bazuar në punën e bërë për hapjen e kanalit që do të shkonte deri në brendësi të burgut. “Agim Leka nuk ka punuar i vetëm. Ne po punojmë së bashku me policinë e Vlorës, për të gjetur lidhje të Lekës me ndonjërin prej të burgosurve në burgun 302”,-pohon zyrtari i policisë së Tiranës. Në rrugë operative, agjentët e policisë kanë filluar hetimet për identifikimin e të gjitha lidhjeve të Agim Lekës, të cilat i kanë çuar hetuesit tek Gaxhai. Policia e Tiranës dyshon se pas këtij plani qendron një grup i organizuar, që ka vënë në lëvizje shumë para për te realizuar arratisjen e tij. Deri në orët e vona të mbrëmjes së djeshme, zyrtarët e policisë ende nuk kishin saktësuar nëse Gaxhai kishte planifikuar të arratisej vetëm, apo me miqtë e tij të qelisë, pa përjashtuar nga hetimi të dënuarit e tjerë VIP të këtij burgu. Hetimet e mëtejshme pritet të zbardhin skemën dhe programuesit e këtij plani perfekt, i cili dështoi nga një sinjalizim i siguruar prej punonjësve të burgut të sigurisë së lartë.






 

 Gazeta Shekulli

webmaster@vloracity.com